Chläggi-Cup 2016

Chläggi Cup Wilchinge, Sa. 14. Mai 2016

Bi sehr unsicherem und immer wieder nassem Wätter händ mir üs am 12.15 Uhr uf dä Wäg is Klettgau gmacht. Mir händ üs gfreut uf dä Wettkampf, händ mir doch so viel trainiert, im Team Aerobic wiä au idä Grätkombi. Es sind je zwei Durchgäng ufem Programm gstandä und so simmer voller Motivation und Erwartige gsii.

Doch dä Himmel isch immer dünkler wordä und bi starch aahaltendem Gwitterräge sind mir in Wilchinge aacho. Nur scho dä Wäg vom Parkplatz (ufere scho ziemlich sumpfige Wiese) bis zum Wettkampfplatz hät glanget, das di meischte scho nassi Füess und Chleider gha händ. Mit Uusnahm vo dä ältere erfahrne Turnerinne, wo mit Stiefel und Rägehosä usgrüschted gsii sind ;o)!

Sofort händ mir vernoh, dass dä Wettkampf für Gymnastik und TeamAerobic wäge Räge und Hagel hät müesse „bis auf weiteres“ unterbrochä wärde. Dä Grätwettkampf isch normal wiitergloffä, dänn dä hät im Fäschtzält am trochnä stattgfundä. Nach churzem wartä isch dänn klar gsii, das mir (mit freiwilligem Entscheid) üsi Team Aerobic chönnd zeige. Zwar numä eimal, aber das isch besser als gar nid!

Am 16.05 Uhr händ mir dänn schliesslich üsi Grätkombi dörfä turne. Zwar ohni Musigprob, däfür begleited vomä ähm nid so würcklich feinem Friteusegruch! Aber händ mir aber alli üses Bescht gäh und ä Notä vo 8.22 erturnt. Das isch ja scho mal en chliine Liechtblick gsii, nachdäm mir üs am Abig vorher am Fiirabigcup in Fehraltorf händ müesse miteme 7.80 begnüege! Und mir händ ja namal ä Chance gha, zum üs steigere…und diä hämmer au wellä nutze!

Sofort händ mir üs umzogä und sind dänn au scho am 17.05 Uhr ufem Vliesplatz für Team Aerobic parat gstandä. So händ mir tatsächlich imene trochnä Momänt, ohni Räge chönnä turne und mit 12 Turnerinne und 8 Turner üsi Vorfüehrig zeige.

Jetz isch Geduld gfröget gsii, dänn dä zweiti Durchgang fürs Grät isch ersch am 19.15 Uhr aagstandä. Und so händ mir dänn als letschtä Verein, voreme grossä Publikum namal dörfä üsi GK turne. Zfriede und voller Erwartige uf dRangverkündigung händ mir jetz zersch mal ä heissi verdienti Duschi gnossä, bevor mir dänn grad no rächtziitig zrugg is Fäschtzält cho sind. Isch doch dä Manu scho ufem Podescht gstandä! Zu üsere Überraschig und dank dä superguete zweite Notä vo 8.68!!! händ mir mit dä Grätkombi dä 3. Rang erreicht! Au im TeamAerobic dörfed mir sehr zfriede sii mitem 5. Rang. Und mitere Nota vo 8.27 wieder bedüütend besser underwegs als letscht Jahr!

Dankä Eui Allne für Euie Iisatz und Eui Motivation! Trotz Räge, Gwitter, Hagel und chüele Temperature isches en lässige Wettkampf gsii!

Sandy